२४ घन्टामा थपिए ६,८२५ जना संक्रमित, ७५ जनाको मृत्यु

२०७८ जेठ,२०विहीबार
काठमाडौं । नेपालमा २४ घन्टाको अवधिमा ६ हजार ८ सय २५ जना कोरोना भाइरस संक्रमित थपिएका छन् भने ७५ जनाको मृत्यु भएको छ । जसमा ६ हजार ८ सय २५ जनामा कोरोना सङ्क्रमण पुष्टि भएको छ । मन्त्रालयका अनुसार गत २४ घन्टामा १८ हजार ५ सय ६२ आरटी पिसिआर विधिबाट कोरोना परीक्षण गर्दा ५ हजार ८ सय २५ र ३ हजार २ सय ११ एन्टीजेन परीक्षण गर्दा एक हजारमा कोरोना सङ्क्रमण पुष्टि भएको छ ।
योसँगै नेपालमा कोरोना भाइरसका कारण सङ्क्रमित हुनेको संख्या ५ लाख ७६ हजार ९ सय ३६ पुगेको छ । झन्डै ४ हजारमा झरेको दैनिक सङ्क्रमण दर फेरि ६ हजार नाघेको छ । यस्तै गत २४ घन्टामा देशभर ५ हजार ९ सय ४ जना कोरोना सङ्क्रमणमुक्त भएका छन् ।
योसँगै नेपालमा कोरोना सङ्क्रमणमुक्त हुनेको संख्या ४ लाख ६७ हजार ४ सय ६७ पुगेको छ । यो दर कुल सङ्क्रमितको ८१ प्रतिशत हो । यस्तै गत २४ घन्टामा थप ७५ जनाको कोरोना सङ्क्रमणका कारण मृत्यु भएको छ । योसँगै नेपालमा कोरोनाका कारण मृत्यु हुनेको संख्या ७ हजार ६ सय ३० पुगेको छ ।