उम्मेदवारविरुद्धको उजुरीमाथि छानबिन शुरु

फिल्को मिसन

२०७९,बैशाख १४बुधबार
काठमाडौं । स्थानीय तह सदस्य निर्वाचनका लागि दर्ता भएको मनोनयनविरुद्ध परेको उजुरीमा निर्वाचन आयोगले आजदेखि (जाँचबुझ) छानबिन थाल्ने भएको छ । आइतबार र सोमबार मनोनयन दर्ता भएकामा मंगलबार उम्मेदवारविरुद्ध उजुरी आह्वान भएको थियो ।
निर्वाचन आयोगका प्रवक्ता शालिकराज शर्मा पौडेलका अनुसार प्राप्त उजुरीमाथि आज र भोलि जाँचबुझ हुने जानकारी दिए । आज र भोलि छानबिन गरेर आयोगले निर्णय पनि लिने बताए । निर्वाचन आयोगका अनुसार वैशाख १६ गते उम्मेदवारले नाम फिर्ता लिने, उम्मेदवारहरूको अन्तिम नामावली प्रकाशन गर्ने र १७ गते मात्रै उम्मेदवारहरूलाई निर्वाचन चिह्न प्रदान गरिने जनाएको छ ।
आयोगका अनुसार ७५३ स्थानीय तहमा ३५ हजार २ सय २१ पदका लागि १ लाख ५० हजार ४९४ जनाको उम्मेदवारी परेको छ । कूल ३५ हजार २२१ पदका लागि वैशाख ३० गते हुन लागेको निर्वाचन सो संख्यामा उम्मेदवारी परेको निर्वाचन आयोगले जनाएको छ ।
प्रमुखमा ३ हजार ४६६, अध्यक्षमा ३ हजार ३७८, उपप्रमुखमा २ हजार १३६ र उपाध्यक्षमा २ हजार ३९२ को मनोनयन परेको छ । यसैगरी वडा अध्यक्षमा ३४ हजार ९४३, महिला सदस्यमा २६ हजार ६३, दलित महिला सदस्यमा २३ हजार ४७० र वड सदस्यमा ५४ हजार ६४६ जनाको उम्मेदवारी मनोनयन दर्ता भएको आयोगले जनाएको छ ।

प्रतिक्रिया दिनुहोस