हेलिकप्टरबाट सुत्केरी महिलाको उद्धार

साउन ८,२०८०
सिमकोट । हुम्लाको नाम्खा गाउँपालिकाबाट एक जना सुत्केरी महिलाको हेलिकप्टरमार्फत उद्धार गरिएको छ । नाम्खा गाउँपालिका ५को यारी गाउँकी ३५वर्षीया छोटेल तामाङलाई हेलिकप्टरमार्फत उद्धार गरी सिमकोट पठाइएको हो ।
उनी सोमबार विहान ५ बजेतिरको समयमा सुत्केरी भएकी थिइन् । सुत्केरी भएर साल अड्कीएपछि उपचारका लागि उनलाई हेलिकप्टरमार्फत जिल्ला अस्पताल ल्याइएको थियो ।
सुत्केरी भएर साल अड्कीउकी तामाङको उद्धारका लागि जिल्ला प्रशासन कार्यालय र जिल्ला अस्पताल हुम्लाको पहल हुम्लाकी सिनियर अनमी सरिता बोहराले जानकारी दिइन् । उनका अनुसार मनाङ एयर हेलिकप्टर मार्फत सोमबार दिउसो २ वजे जिल्ला अस्पतालमा ल्याएको हो ।
नाम्खा गाउँपालिकाको आर्थिक सहयोगमा उनको जिल्ला अस्पतलामा उपचार भईरहेको र उनको स्वास्थ्य अवस्था सामान्य रहेको सिनियर अनमी बोहराले बताइन् ।